សហព័ន្ធកីឡាបាល់ទាត់កម្ពុជា (ស.ប.ក) បានបង្ហាញបញ្ជីឈ្មោះកីឡាករជម្រើសជាតិកម្ពុជា ចំនួន២៥រូបមកពី ៩ ក្លិបត្រៀមចូលហ្វឹកហាត់ដើម្បីប្រកួតលើឆាកអន្តរជាតិចំនួន២ប្រកួតផ្សេងគ្នានៅដើមខែមិថុនា ខាងមុខនេះ។
លោក Leonardo Vitorino ដែលជាគ្រូបង្វឹកក្រុមជម្រើសជាតិកម្ពុជាបានប្រកាសឈ្មោះកីឡាករទាំង២៥នាក់មានដូចជា អ្នកចាំទី៖ ស៊ូ យ៉ាទី (បឹងកេត), ហ៊ុល គឹមហ៊ុយ (សាលាបាល់ទាត់ជាតិ), អ៊ុំ សេរីរ័ត្នន៍ (ការពារជាតិ) អោម ឧត្តម (ព្រះខ័នរាជស្វាយរៀង)។ ចំណែកខ្សែការពារ៖ ឆុំ ពិសា (ភ្នំពេញក្រោន), ណុប តុលា (ព្រះខ័នរាជស្វាយរៀង), សឿយ វិសាល (ព្រះខ័នរាជស្វាយរៀង), ប៊ិន ធារី (Krabi FC), នេន សុធារដ្ឋ (ព្រះខ័នរាជស្វាយរៀង), សឿត បារាំង (ភ្នំពេញក្រោន), រស់ សំអឿន (បឹងកេត), ឈិន ឈឿន (ការពារជាតិ)។ ខ្សែបម្រើវិញមាន៖ ទិត្យ ឌីណា (នគរបាលជាតិ), ប្រាក់ មុន្នីឧត្តម (ព្រះខ័នរាជស្វាយរៀង), ហួយ ផល្លីន (ព្រះខ័នរាជស្វាយរៀង), ប្រាក់ ធីវា (ភ្នំពេញក្រោន), សុន វណ្ណដេត (នគរបាលជាតិ), អ៊ិន សូដាវីដ (ភ្នំពេញក្រោន), ច្រឹង ពលរដ្ឋ (ការពារជាតិ)។ ចំពោះខ្សែប្រយុទ្ធគឺ៖ កែវ សុខផេង (ភ្នំពេញក្រោន), កែវ សុខង៉ន (ភ្នំពេញក្រោន), ឃួន ឡាបូរ៉ាវី (ឃួន ឡាបូរ៉ាវី), ចាន់ វឌ្ឍនាកា (Fujieda MYFC) , នួន បូរី (នគរបាលជាតិ), សារី ម៉ាត់ណូរ៉ូទីន (ណាហ្គាវើល)។
លោក Leonardo Vitorino នឹងចាប់ប្រមូលកូនក្រុមពីថ្ងៃទី១ ខែមិថុនា តទៅ ខណៈក្រុមជម្រើសជាតិកម្ពុជា មានបេសកម្មសំខាន់មួយទៀត ក្រៅពីត្រូវប្រកួតមិត្តភាពអន្តរជាតិជាមួយក្រុមជម្រើសជាតិឥណ្ឌូណេស៊ី នៅថ្ងៃទី៨ ខែមិថុនា ឆ្នាំ២០១៧ លើទីលានពហុកីឡដ្ឋានជាតិក្នុងរាជធានីភ្នំពេញ នៅ៥ថ្ងៃបន្ទាប់គឺនៅថ្ងៃទី១៣ ខែមិថុនា ត្រូវត្រៀមខ្លួនប្រកួតវគ្គជម្រុះពូល C នៃវគ្គជម្រុះពានរង្វាន់ជើងឯកទ្វីបអាស៊ី (AFC Asian Cup 2019 UAE)។ ចំណែកសំបុត្រសម្រាប់ចូលទស្សនាការប្រកួតមិត្តភាពអន្តរជាតិរវាងក្រុមជម្រើសជាតិកម្ពុជា ជាមួយក្រុមជម្រើស ជាតិឥណ្ឌូណេស៊ី បានដាក់លក់ចាប់ពីថ្ងៃអាទិត្យ ទី២៨ ខែឧសភា ឆ្នាំ២០១៧តទៅ តទៅនៅមាត់ច្រកចូលពហុកីឡដ្ឋានជាតិ ក្នុងរាជធានីភ្នំពេញ ក្នុងតម្លៃជា២គឺតម្លៃ ១ម៉ឺនរៀល ត្រង់កន្លែងដែលមានដំបូល ហើយតម្លៃ៥ពាន់រៀលនៅកន្លែងជុំវិញ គ្មានដំបូល។
បើនិយាយពីវគ្គជម្រុះពានរង្វាន់ជើងឯកទ្វីបអាស៊ី របស់កម្ពុជា វិញ បានធ្វើដំណើរទៅប្រកួតជាមួយម្ចាស់ផ្ទះហ្ស៊កដានី កាលពីថ្ងៃទី២៨ ខែមីនា ឆ្នាំ២០១៧ តែចាញ់ក្នុងលទ្ធផល ៧ទល់០ ហើយនៅថ្ងៃទី១៣ ខែមិថុនា ឆ្នាំ២០១៧ កម្ពុជា ត្រូវបើកទ្វាកីឡដ្ឋានខ្លួនទទួលក្រុមអាហ្វហ្គានីស្ថាន ម្ដងមុនបញ្ចប់ជុំទី១ បន្តទទួលវៀតណាម នៅថ្ងៃទី៥ ខែកញ្ញា ឆ្នាំ២០១៧។ សម្រាប់ជើងទី២ កម្ពុជា ត្រូវធ្វើដំណើរទៅប្រកួតនៅវៀតណាម វិញម្ដងក្នុងថ្ងៃទី១០ ខែតុលា ឆ្នាំ២០១៧ ហើយនៅថ្ងៃទី១៤ ខែវិច្ឆិកា ឆ្នាំ២០១៧ ត្រូវទទួលក្រុមហ្ស៊កដានី វិញម្ដង មុនប្រកួតបញ្ចប់វគ្គជម្រុះក្នុងពូលជាមួយអាហ្វហ្គានីស្ថាន នៅថ្ងៃទី២៧ ខែមីនា ឆ្នាំ២០១៨៕
